ဒေါသ

                                                            စိတ်တိုလွယ်ခြင်း

ကျွန်တော့် စိတ်မှာ ဒေါသဖြစ်လွယ်၊ စိတ်တိုလွယ်ပြီး ကိစ္စ အတော်များများကို သံသ ယဖြစ်ပွါးနေရခြင်းရဲ့ အကြောင်းကို လေ့လာကြည့်လိုက်တော့ အောက်ပါ အချက် များကို တွေ့လိုက်ရတယ်။

1)     အိပ်ရေးပျက်လွန်းမှုများခြင်း

2)     နေ့စဉ် အထိုင်များခြင်း

3)     ကိုယ်လက်လှုပ်ရှားမှု နည်းပါးခြင်း

4)     လိင်စိတ် လွန်ကဲခြင်း

5)     စာပေဖတ်ရှုမှု မရှိခြင်း နှင့်

6)     ဂိမ်း အလွန်အမင်း ကစားမှု တို့ကြောင့်

ဆိုတာကို လေ့လာ တွေ့ရှိရပါတယ်။

လူတစ်ယောက်ရဲ့ ပုံမှန် အိပ်ချိန် အတိုင်းအတာကို မရရှိတဲ့အခါ ခန္ဓာကိုယ်ဇီဝ ဖြစ်စဉ်တွေ ပြောင်းလဲပြီး၊ စိတ်တိုလွယ်ကြောင်း အသက်တိုတတ်ကြောင်း အနောက်တိုင်း သူတေသီများရဲ့ လေ့လာသုတေသန ပြုချက်များအရ သိရပါတယ်။ စမ်းသပ်ချက်များက ခွေး ၁၀ ကောင်နှင့် စမ်းသပ်ခဲ့တာ ဖြစ်ပါတယ်။ ၅ ကောင်စီ ကို တစ်အုပ်စုဖွဲ့ပြီး၊ တစ်ဖွဲ့ကို အစားကောင်းကောင်း ကျွေးပြီး မအိပ်ခိုင်းပါဘူး။ တစ်ဖွဲ့ကိုတော့ အစားမကျွေးပဲ အိပ်ခိုင်းထားပါတယ်။ တစ်လလောက်ကြာတဲ့ အခါ မအိပ်ရတဲ့ ခွေး ၅ ကောင်အနက် ဖျားခြင်း၊ သေဆုံးခြင်း စတာတွေ ဖြစ်ပေါ်ပေမယ့် အစာမစားရပေမယ့် အိပ်ရေးဝတဲ့ ခွေးတွေဟာ ဘာမှ ထူးခြားမှု သိပါမရှိဘူး ဆိုတာ သိခဲ့ရပါသတဲ့။ ဒီအချက်ကို ကြည့်ခြင်းအားဖြင့် အိပ်စက်ခြင်းရဲ့ အရေးပါပုံကို သိမြင်လောက်ပြီလို့ ယူဆပါတယ်။

ဒါကြောင့် ပုံမှန် အိပ်ချိန်ရအောင် ညှိယူရပါမယ်။ လူတစ်ယောက်နဲ့ တစ်ယောက်ဟာ အိပ်ချိန်ချင်း မတူကြပါဘူး။ အိပ်စက်လိုက်လို့ စိတ်မှာ လန်းလန်းဆန်းဆန်း နဲ့ ပျော်ပျော်ရွှင်ရွှင် နိုးထ လာတယ် ဆိုရင် ဒါဟာ သင့်ရဲ့ အကောင်းမွန်ဆုံး အိပ်ချိန်ပါပဲ။ လူတစ်ယောက်ဟာ ၃ ဆက်တိုက် ထိတော့ အိပ်ရေး ပျက်ခံနိုင်ပါတယ်။ တစ်ရက်ကို နာရီနည်းနည်း စီ အိပ်ရေးပျက်သွားရုံနဲ့ သိပ်မသိသာပါဘူး။ အကြွေးမှတ်ထားလို့ ရတယ် ဆိုတဲ့ သဘောပါပဲ။ အဲ အိပ်ရေး အပျက်များ ရင်တော့ မရတော့ဘူး။ စိတ်ကိုထိခိုက်စေပြီး စိတ်မရှည်တော့ဘူး။ အကြွေးများသွားသူလိုပေါ့။ အဲဒီအခါမှာ တိုးရင်းပေါင်း အကြွေးဆပ်တဲ့ အနေနဲ့ တစ်ရက်လောက် ဖြစ်ဖြစ် အိပ်ရေးဝတဲ့ထိ အိပ်ရေး မ၀မခြင်း အိပ်စက်သင့်ပါတယ်။ ၁၂ နာရီလည်း ဖြစ်နိုင်သလို ၂၄ နာရီလည်း ဖြစ်နိုင်တယ်။ မွေးကင်းစ ကလေးငယ် တစ်ယောက် အိပ်ချိန်ဟာ ၁၈ နာရီ ရှိပါတယ်။ အရွယ်ရောက်လာရင် ၁၂ နာရီပါ။ သာမာန် လူတစ်ယောက်အနေနဲ့ အနည်းဆုံး အိပ်ချိန် ၈ နာရီ ရှိသင့်ပါတယ်။

အထိုင်များပြီ ဆိုမှတော့ ကိုယ်လက်လှုပ်ရှားမှု နည်းပါးမယ် ဆိုတာ သေချာပါတယ်။ အထိုင်များခြင်းဟာ ရောဂါပေါင်းစုံရဲ့ ဇစ်မြစ် ဖြစ်နေတတ်ပါတယ်။ သုတေသန ပြုချက်အရ လူတစ်ယောက် စားသုံးလိုက်တဲ့ ကယ်လိုရီတွေ ပြန်လည် ချေဖျက်နိုင်ဖို့ အတွက် တစ်ရက်ခြေလှမ်း ၂ သောင်းလောက် လမ်းလျှောက်သင့်တယ်လို့ ဆိုထားပါတယ်။ လမ်းမလျှောက်နိုင်ဘူးဆိုရင် အိမ်ရှင်းတာတို့ ၊ ခြံရှင်းတာတို့၊ အ၀တ်လျှော်၊ မီးဖိုချောင်ကိစ္စ လုပ်တာတို့စတဲ့ကိုယ်လက်လှုပ်ရှားမှုတွေ လုပ်ပေးသင့်ပါတယ်။ ဒီလိုမှ မဟုတ်ပဲ နေ့စဉ် ရက်ဆက်ဆိုသလို အထိုင်များသူ တစ်ယောက်ဆိုရင် ကယ်လိုရီတက်လို့ ကိုယ်အလေးချိန် များလာပြီး ၀ လာနိုင်ပါတယ်။ နဂိုပိန်သူ တစ်ယောက် ဆိုရင်တော့ ဇက်ကြောတက်ခြင်း၊ စိတ်တိုလွယ်ခြင်း၊ စိတ်ကျရောဂါ ဖြစ်ခြင်းတို့ကို ခံစားဖို့ အလားလာ များပါတယ်။ ဒီနေရာမှာ ကျင့်စဉ်တစ်ရပ် အနေနဲ့ ထိုင်ခြင်းကိုတော့ မရည်ရွယ်ပါဘူး။ အမှုမဲ့ အမှတ်မဲ့ ထိုင်နေခြင်းမျိုးကို ဆိုလိုခြင်းပါ။ ယောဂ ကျင့်စဉ် ထိုင်ခြင်းကတော့ ခန္ဓာကိုယ်ပုံစံနဲ့ အသက်ရှုမှုတွေကြောင့် ကျန်းမာရေး အတွက် သိပ်ကို ကောင်းပါတယ်။ တရားထိုင်ခြင်းဟာလည်း စိတ်ထွက်ပေါက် ဖြစ်စေတဲ့ အတွက် ရောဂါ အတော်များများကို သက်သာစေကြောင်း တွေ့ရှိထားပြီး ဖြစ်ပါတယ်။

လိင်စိတ်လွန်ကဲခြင်းနဲ့ ဂိမ်းဆော့များခြင်း တို့ဟာလည်း လူ့စိတ်ကို အရိုင်းစိတ် ပေါက်စေတတ်ပါတယ်။ ဂိမ်းဆော့ ခြင်းကြောင့် စိတ်အလိုမကျခြင်း၊ ဒေါသဖြစ်ခြင်း၊ ရှုံးနိမ့်ခြင်းကြောင့် မကျေမချမ်း ဖြစ်ခြင်း တို့ကို ခံစားရစေပါတယ်။ သတ်တဲ့၊ ဖြတ်တဲ့ ဂိမ်းများကို ကစားရင် ပိုဆိုးပါတယ်။ ဂိမ်းကစားများတဲ့ ကလေး အများစု ဟာ စိတ်မရှည်ကြတာ များပါတယ်။ လူကြီးကိုလည်း လူကြီးမှန်းမသိ၊ ရွယ်တူချင်းချင်းလည်း လေးစားသမှု မရှိတော့တာ သတ်ဖြတ်ဂိမ်းများ ဆော့ကစား ခြင်းကြောင့်ပါ။

နောက်ထပ် ပံ့ပိုးတဲ့ အခြားအကြောင်းရင်း တစ်ခုကတော့ ပတ်ဝန်းကျင် ရိုင်းစိုင်းမှု ပါ။ လူတစ်ယောက်ဟာ ရိုင်းစိုင်းတဲ့ ပတ်ဝန်းကျင်ကို ရောက်သွားခဲ့ရင် အရိုင်းစိုင်း တစ်ယောက် ဖြစ်သွားဖို့ အတွက် ၉၀ ရာနှုန်း သေချာနေပါတယ်။ ဒါ ဘာကြောင့် ဒီလောက်သေချာ နေလည်း ဆိုရင် ကိုယ်တွေ့ကြောင့်ပါ။ ကျွန်တော်တို့ဟာ ဆိတ်ငြိမ် ရပ်ကွက် တစ်ခုကနေ အမှတ်မထင် ပြောင်းရွှေ့ခဲ့ရပြီး၊ ရွာတစ်ရွာ ဆီကို ရောက်သွားတယ်။ အဲဒီရွာကလူတွေက အေးချမ်းကြပေမယ့် အိမ်မျက်စောင်းထိုးက ကုရင်မ တစ်ယောက်ကတော့ အရက်ကို အားအား ရှိ အချိတ်တိုင်း သောက်ပြီး ရပ်ကွက်ကိုလည်း အော်အော်ဆဲနေလေ့ ရှိပါတယ်။ တစ်ရက်၊ တစ်လ ဆိုရင် ပြောစရာ မရှိပါဘူး။ နှစ်တွေ ကြာလာတဲ့ အထိ ဒီဆဲဆိုသံ တွေ ကြားတာများလာတော့ ကြားရသူရဲ့ စိတ်တွေ ကြမ်းတမ်းလာတယ်။ ပြောရဲလား ဆိုတော့ ဆေးလက်မှတ်ရှိတယ် ဆိုလို့ သွားလည်း မပြောရဲဘူး။ ခံပေါ့။ နောက်ပြီး သူ့အိမ်ဘေးက ၀ိုင်းလွတ်ထဲမှာလည်း ညနေ ညနေပိုင်းဆိုရင် ရွာသူရွာသားတွေ ပိုက်ကျော်ခြင်း လာလာခတ်လေ့ရှိတယ်။ လူငယ်တွေ ဆိုတော့ သိတဲ့အတိုင်း အားရပါးရ အော်ဟစ်ခြင်း၊ စိတ်လိုက်မာန်ပါ ဆဲဆိုခြင်း တွေ ရှိတယ်။ ဆိုတော့ ဒီအသံတွေကို နေ့စဉ်နဲ့ အမျှ ကြားနေရတော့ စိတ်ရိုင်းပေါက်ဖို့ အတွက် အကြောင်းအထောက်အပံ့ တစ်ခု ဖြစ်တယ် ဆိုတာ သေချာနေပါတော့တယ်။

စာဖတ်အားနည်းလာရင် ဘာဖြစ်လာလည်း ဆိုတော့ တုံး အ လာတတ်တယ်။ ခံစားချက်များလွန်းတဲ့ အခါ စိတ်ဟာ ထွက်ပေါက်မရှိပဲ မွန်းကျပ်နေတတ်တယ်။ ဒါကို တချို့တလေက ယမကာ နဲ့ ထွက်ပေါက်ရှာတတ်ကြတယ်။ မိန်းကလေးတွေ ဆိုလည်း စိတ်ထွက်ပေါက် ရှာတဲ့အနေနဲ့ လုပ်မိလုပ်ရာ လုပ်တတ်ကြတယ်။ အမှန်က စာဖတ်လိုက်ရုံနဲ့ အကျိုးများစွာ ဖြစ်ထွန်းစေပါတယ်။ စိတ်တည်ငြိမ်စေတယ်။ အာရုံစူးစိုက်မှု အားကောင်းတဲ့ အတွက် အခြားအကြောင်းအရာ တွေကို တွေးနေဖို့ အခွင့် မသာဘူး။ အာရုံစူးစိုက်မှု အားကောင်းလာတာနဲ့ တပြိုင်နက် သမာဓိတည်လာပြီဆိုရင် အဆိုးအကောင်း၊ အမှားအမှန်ကို ဝေဖန်ပိုင်းခြား လာနိုင်ပြီး မိမိကိုယ်မိမိ ပြန်လေ့လာ သုံးသပ်နိုင်တယ်။ စာဖတ်ခြင်းဟာ တစ်ထိုင်ထဲနဲ့ ဗဟုသုတ အများကြီးကို ရစေတဲ့ အတွက် လူ ရာ, ထောင် ပေါင်းများစွာနဲ့ စကားပြောခြင်းလည်း မြည်ပါတယ်။ ကိုယ်မသိတာတွေ သိလာသလို၊ မိမိ ခံစားနေရတဲ့ ရုပ်ဖြစ်စဉ်၊ နာမ်ဖြစ်စဉ်တွေကို စာထဲမှာ တွေ့တွေ့ လာရတယ်။ စာဖတ်ပုံခြင်း တူပေမယ့် ခံယူနှလုံးသွင်း ဆင်ခြင်ပုံခြင်း မတူနိုင်ပါဘူး။ စာအုပ်တစ်အုပ်ကို ပဲ ပထမအကြိမ် ဖတ်တဲ့ အတွေးနဲ့ ဒုတိယ အကြိမ် ဖတ်တဲ့ အတွေး မတူပါဘူး။ ဒါ ဘာကြောင့်လဲ ဆိုရင် မိမိ အတွေ့အကြုံ ရယ် မိမိ ဥာဏ်ပညာ ရယ်ကြောင့် အပြောင်းအလဲ ဖြစ်ရခြင်းပါ။ တင်စားရမယ် ဆိုရင် ကောင်းကင်ကြီးကို ထွက်ကြည့်ရသလိုပဲ။ ကျွန်တော်တို့ ကောင်းကင်ကြီးကို မွေးစက အခု အချိန်ထိ အကြိမ်ကြိမ် မြင်ဖူးနေတာပဲ။ ငယ်ရွယ်စဉ်ကတော့ ကောင်းကင်ကြီး ကြည့်ပြီး စိတ်ကူးယဉ်တယ်။ လူလတ်ပိုင်းရောက်လာတော့ သဘာဝ အလှကို ခံစားတယ်။ ရင့်ကျက်လာတဲ့ လူတစ်ယောက် အတွက်ကတော့ သံဝေဂတရား  ဖြစ်ပွါးမှာပဲ။ အပြောကျယ်လှတဲ့ ကောင်းကင်ကြီးကို ရှုမြင်ပုံခြင်း မတူကြသလို၊ စာအုပ်စာပေ ဖတ်ရှုပုံခြင်းလည်း မတူနိုင်ပါဘူး။ စာဖတ်ခြင်းဟာလည်း စိတ်ထွက်ပေါက်ဖြစ်တတ်တဲ့ အတွက် ဖိစီးမှု လျှော့ချပေးပါတယ်။

အားလုံးကို ခြုံငုံပြီး ပြောရမယ် ဆိုရင် ဘယ်အရာကို မှ လွန်လွန်ကျူးကျူး မပြုလုပ်သင့်ကြောင်း ဆိုတဲ့ အချက်ကို တွေ့ရတယ်ဆိုတာ တင်ပြလိုက်ရပါတယ်။

xxxxxxx

ကလောင် - သိရ် (အေးသာယာ)